ដោយ តាំង សារ៉ាដា
2013-01-29
RFA
មន្ត្រីជាន់ខ្ពស់របស់រដ្ឋាភិបាលថៃ ប្រកាសជំហរសន្តិភាពរបស់ខ្លួនក្នុងការគោរពដល់សេចក្តីសម្រេចនានារបស់តុលាការយុត្តិធម៌អន្តរជាតិ (ICJ) ក្នុងករណីជម្លោះប្រាសាទព្រះវិហារជាមួយកម្ពុជា។
រហូតមកទល់ពេលនេះ ភាគីទាំងសងខាងកំពុងរង់ចាំសវនាការជាសាធារណៈនៅពាក់កណ្ដាលខែមេសា ខាងមុខ ក្នុងករណីជម្លោះដីទំហំជាងបួនគីឡូម៉ែត្រក្រឡាក្បែរប្រាសាទព្រះវិហារ។
អគ្គលេខាធិការនៃក្រុមប្រឹក្សាសន្តិសុខជាតិរបស់ថៃ លោក ផារ៉ាដន ផាត់ថាណាថាប៊ុត (Paradorn Pattanathabutr) បានថ្លែងកាលពីថ្ងៃអាទិត្យ ថា ក្រុមប្រឹក្សានេះនឹងយល់ព្រមឲ្យមានការអភិវឌ្ឍរួមគ្នារវាងកម្ពុជា និងថៃ ក្នុងតំបន់ជម្លោះជុំវិញប្រាសាទព្រះវិហារ ប្រសិនបើតុលាការយុត្តិធម៌អន្តរជាតិកាត់សេចក្តីឲ្យដីទំហំ ៤ចុច ៦ គីឡូម៉ែត្រក្រឡា ជារបស់កម្ពុជា ហើយថាភាគីថៃ ត្រូវតែគោរពសេចក្តីសម្រេចនោះ។
កាសែត ឌឹណេសិន (The Nation) របស់ថៃ បានដកស្រង់សម្ដីលោក ផារ៉ាដន ផាត់ថាណាថាប៊ុត ចុះផ្សាយនៅថ្ងៃច័ន្ទ នេះថា ប្រសិនបើថៃ ប្រកាន់ជំហររបស់ខ្លួនជាសមាជិកនៃអង្គការសហប្រជាជាតិ និងសហគមន៍អន្តរជាតិ នោះប្រជាជាតិថៃ ទាំងអស់ត្រូវតែគោរពសេចក្តីសម្រេចរបស់តុលាការយុត្តិធម៌អន្តរជាតិ ដើម្បីសន្តិភាពទាំងអស់គ្នា បើមិនដូច្នេះទេ នោះបញ្ហានឹងអាចក្លាយជាបញ្ហាដ៏ធំ។
ឆ្លើយតបទៅនឹងការអះអាងរបស់ភាគីថៃ ដែលចង់ធ្វើការអភិវឌ្ឍរួមគ្នាជាមួយកម្ពុជា ក្នុងតំបន់ជម្លោះក្រោយសាលក្រមតុលាការយុត្តិធម៌អន្តរជាតិនេះដែរ អ្នកនាំពាក្យនៃក្រសួងការបរទេសកម្ពុជា លោក គុយ គួង មានប្រសាសន៍ថា គ្រប់ភាគីទាំងអស់ត្រូវរក្សាភាពស្ងៀមស្ងាត់ ដើម្បីរង់ចាំការបកស្រាយ និងសេចក្តីសម្រេចរបស់តុលាការយុត្តិធម៌អន្តរជាតិជាមុន។
លោក គុយ គួង៖ «យើងអត់មានអ្វីនិយាយទេ ព្រោះឥឡូវហ្នឹងរឿងក្តីស្ថិតនៅក្នុងដៃតុលាការយុត្តិធម៌អន្តរជាតិទីក្រុងឡាអេ ហើយ។ ដូច្នេះ អ្វីៗទាំងអស់ យើងត្រូវរង់ចាំសេចក្តីសម្រេចរបស់តុលាការជាមុនសិនបាទ។ យើងមិនអាចនិយាយថាអ៊ីចេះ ថាអ៊ីចុះបានទេ ហើយភាគីទាំងអស់ត្រូវរក្សាភាពស្ងប់ស្ងាត់ រង់ចាំមើលសវនាការជាសាធារណៈ ហើយនិងរង់ចាំមើលការសម្រេចជាផ្លូវការរបស់តុលាការសិនបាទ»។
សវនាការជាសាធារណៈរបស់តុលាការយុត្តិធម៌អន្តរជាតិ នឹងប្រព្រឹត្តទៅចាប់ពីថ្ងៃទី១៥ ដល់ថ្ងៃទី១៩ ខែមេសា ហើយតម្រូវឲ្យភាគីកម្ពុជា និងថៃ ធ្វើសេចក្តីថ្លែងការណ៍ផ្ទាល់មាត់។ តុលាការអន្តរជាតិមួយនេះ គ្រោងចេញសាលក្រមជាស្ថាពរ នៅខែតុលា។
តុលាការយុត្តិធម៌អន្តរជាតិ បានសម្រេចឲ្យកម្ពុជា ឈ្នះក្តីករណីជម្លោះប្រាសាទព្រះវិហារ នៅឆ្នាំ១៩៦២ ហើយសម្រេចឲ្យភាគីថៃ ដកកងទ័ពរបស់ខ្លួនចេញពីប្រាសាទព្រះវិហារ និងចេញពីតំបន់ជុំវិញប្រាសាទព្រះវិហារ ព្រមទាំងបញ្ជាឲ្យភាគីថៃ ប្រគល់វត្ថុបុរាណទាំងអស់មកឲ្យកម្ពុជា វិញ៕
Posted in:
