បុរសម្នាក់បានស្លាប់ភ្លាមៗ ខណៈកំពុងជិះម៉ូតូ ត្រូវរថយន្តធំបើកជែងគ្នាបុកចំពីមុខពេញទំហឹង
ចេញផ្សាយថ្ងៃ (ថ្ងៃ ពុធ ទី ៣០ ខែ មករា ឆ្នាំ ២០១៣ ម៉ោង ១០:០៨:២៦ ព្រឹក)
រាជធានីភ្នំពេញ៖ បុរសម្នាក់ បានស្លាប់ភ្លាមៗនៅនឹងកន្លែងកើតហេតុ ខណៈដែលគេកំពុងជិះម៉ូតូ ត្រូវរថយន្តធុនធំ២គ្រឿង បើកជែងគ្នា ជ្រុលទៅបុកចំពីមុខពេញទំហឹង កាលពីយប់ ថ្ងៃទី២៩ ខែមករា ឆ្នាំ២០១៣ នៅលើកំណាត់ផ្លូវចំការដូង ក្នុងភូមិជើងឯក សង្កាត់ជើងឯក ខណ្ឌដង្កោ រាជធានីភ្នំពេញ។
ព័ត៌មានពីនគរបានចរាចរណ៍ នៅកន្លែងកើតហេតុបានឲ្យដឹងថា សពជនរងគ្រោះឈ្មោះ តែម សារឿន អាយុ៤៦ឆ្នាំ រស់នៅភូមិព្រែកតាឡៃ សង្កាត់ព្រែកកំពឹស ខណ្ឌដង្កោ។ មុនពេលកើតហេតុ បុរសរងគ្រោះជិះម៉ូតូសេ១២៥ ពណ៌ខ្មៅ ពាក់ស្លាកលេខកណ្តាល 1B-1934 តាមបណ្តោយផ្លូវចំការដូង ទិសដៅពីជើងទៅត្បូង។ លុះដល់ចំណុចកើតហេតុ រថយន្តធំមួយគ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ 3A-4859 បានបើកជែងជាមួយរថយន្តធំមួយគ្រឿងទៀត ដោយល្បឿនយ៉ាងលឿន ហើយជ្រុលទៅបុកម៉ូតូដែកំពុងជិះបញ្ច្រាសទិសគ្នាយ៉ាងពេញទំហឹង បណ្តាលឲ្យអ្នកជិះម៉តូស្លាប់ភ្លាមៗតែម្ដង។ ក្រោយកើតហេតុ អ្នកបើកបររថយន្តបានចុះរត់គេចខ្លួនបាត់។
បច្ចុប្បន្ន រថយន្តបង្កទាំងពីរគ្រឿង និងម៉ូតូជនរងគ្រោះ សមត្ថកិច្ចយកទៅរក្សា ទុកនៅការិយាល័យចរាចរណ៍ជើងគោក រាជធានីភ្នំពេញ ដើម្បីដោះស្រាយទៅតាមផ្លូវច្បាប់៕
Posted in:
